Завқӣ Завқизода дар Форуми Чин-Осиёи Марказӣ иштирок намуд

Дирӯз бо иштироки Вазири савдои Ҷумҳурии Мардумии Чин, муовини Сарвазир – Вазири савдо ва ҳамгироии Ҷумҳурии Қазоқистон, муовини Сарвазир – Вазири сармоягузорӣ ва савдои хориҷии Ҷумҳурии Узбекистон, Вазири рушди иқтисод ва савдои Ҷумҳурии Тоҷикистон, Вазири иқтисод ва савдои Ҷумҳурии Қирғизистон, Вазири савдо ва равобити иқтисоди хориҷии Туркманистон, муовини директори генералии Корпоратсияи миллии нафту гази Чин Форуми Чин-Осиёи Марказӣ доир гардид.

Тавре аз Вазорати рушди иқтисод ва савдои Ҷумҳурии Тоҷикистон хабар доданд, Форуми мазкур дар шакли видеоконфронс сурат гирифт.

Дар форум Вазири рушди иқтисод ва савдо Завқӣ Завқизода иброз намуд, ки солҳои охир бо шарофати сиёсати хирадмандона ва дурандешонаи сарони давлатҳои иштирокчии форум, аз ҷумла бо талошҳои пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҳамкории иқтисодӣ миёни кишварҳои Осиёи Марказӣ ва Чин босуръат рушд карда, ба сатҳи баланд расидааст.

Номбурда зикр намуд, ки Чин яке аз шарикони асосии тиҷоратӣ ва аз ҷумлаи бузургтарин сармоягузорон барои бисёр кишварҳои Осиёи Марказӣ, аз ҷумла Ҷумҳурии Тоҷикистон гардидааст.

Иттилоъ дода шуд, ки соли 2021 гардиши савдои хориҷӣ бо Чин нисбат ба соли 2020  78 фоиз афзуда, ҳиссаи савдо бо ин кишвар дар соли сипаригардида 13,2 фоизро ташкил дод. Ин дар сохтори гардиши савдои хориҷии Ҷумҳурии Тоҷикистон мақоми 4-умро ташкил медиҳад.

Дар ҷамъбасти форум намояндагони кишварҳои ширкаткунанда бо зикри дастовардҳои хуби минтақа дар соҳаҳои тиҷоративу иқтисодӣ омодагии худро барои боз ҳам вусъат бахшидани он изҳор намуданд.