Сафири Тоҷикистон бо Раиси вилояти Одесса мулоқот намуд

Дирӯз дар шаҳри Одесса мулоқоти Сафири Тоҷикистон дар Украина Давлаталӣ Назризода бо Раиси вилояти Одессаи Украина Сергей Гриневетский доир гардид. Дар ин бора Вазорати корҳои хориҷии Ҷумҳурии Тоҷикистон хабар медиҳад.

Ба иттилои манбаъ, зимни сӯҳбат ҷонибҳо вазъи кунунӣ ва дурнамои ҳамкориҳои Тоҷикистон ва Украинаро дар соҳаҳои иқтисоду савдо, саноат, энергетика, нақлиёту транзит, кишоварзӣ, маориф ва тандурустӣ мавриди баррасӣ қарор доданд.

Ҳамзамон, ба масъалаҳои таҳкими ҳамкориҳо байни минтақаҳои Тоҷикистону Украина, баргузор намудани форуми соҳибкорони ҳарду кишвар ва бунёди корхонаҳои муштараки саноатӣ таваҷҷуҳи хоса зоҳир гардид.