Имрӯз дар Душанбе Рӯзи байналмилалии ҳифзи кӯдакон таҷлил мегардад

Бо ибтикори Муассисаи давлатии маркази наврасону кудакони шаҳри Душанбе имрӯз дар амфитеатри кудакон ва наврасони пойтахти кишвар бахшида ба рӯзи байналмиллалии ҳифзи кӯдакон чорабинии бошукӯҳи фархангӣ доир мегардад.

Тавре хабарнигори бахши форсии радиои «Овози тоҷик» Абдулвоҳидова Заррина зимни суҳбат бо сардори Раёсати таҳсилот ва кор бо таълимгирандагони МДМКН-и шаҳри Душанбе Икромов Фирдавс иттилоъ медиҳад, дар чорабинии мазкур таълимгирандагони муассиса, ки дар озмунҳои гуногун ширкат варзида, ғолиб баромаданд, бо диплом ва ҷоизаҳои таъсисдодаи Кумитаи тадорукот ва маркази кудакону наврасони пойтахт сарфароз мегарданд. Ин озмунҳое мебошанд, ки дар он наврасону кӯдакон аз тамоми минтақаҳои кишвар ширкат варзиданд.

Маврид ба зикр аст, ки МДМКН-и шаҳри Душанбе яке аз марказҳои кӯдаконае мебошад, ки барои омодасозии мутахассисони гуногунсоҳа, олимони ояндае, ки барои ҷумҳурии мо зарур арзёбӣ мегарданд, саҳми босазо гузоштааст. Фаъолияти маркази мазкур назаррас буда, дар соли 2021 40 маҳфил доир намуд, ки  дар он беш аз 1550 таълимгирандагон дар 2 баст ба машғулият фаро гирифта шудаанд.

Чорабинии бузурге, ки ба муносибати таҷлили Рӯзи байналмилалии  ҳифзи кӯдакон баргузор мегардад,  барномаи ҷолиби фарҳангиро  барои кӯдакон пешкаш менамояд.

Ёдовар мешавем, ки  бахшида ба Рӯзи байналмилалии  ҳифзи кӯдакон, ки ҳамасола 1 июн таҷлил мешавад, дар тамоми гӯшаву канори Тоҷикистон, аз ҷумла дар пойтахти мамлакат-шаҳри Душанбе  чорабиниҳои гуногун баргузор мегардад. Бояд илова намуд, ки  бахшида ба  ин рӯз барои кӯдакон ҳар гуна барномаҳои фарҳангию фароғатӣ, намоишҳои театрикунонидашуда ва  маъракаҳои хайриявӣ  баргузор мегарданд.

Бояд зикр намуд, ки  соли 1949 намояндагони конгресси занон, ки дар Париж мегузашт, аз ҳама мардуми олам даъват ба амал оварданд, ки барои сулҳ мубориза баранд, зеро танҳо сулҳ метавонад ҳаёти хушбахтонаи кӯдаконро муҳайё созад. Ба ин тариқ, Рӯзи байналмилалии кӯдакон таъсис ёфт, ки аввалин идаш 1 июни соли 1950 барпо гардид ва он то имрӯз ҷашн гирифта мешавад.

Соли 1959 аз ҷониби Созмони Милали Муттаҳид Изҳороти ҳуқуқи кӯдак қабул карда шуда, аз ҷониби кишварҳои зиёд эътироф гардид. Баъдан  соли 1989 ин ташкилот Созишномаи ҳуқуқи кӯдакро тасдиқ кард, ки вазифа ва уҳдадориҳои ҳама давлатҳоро нисбат ба шаҳрвандони ноболиғашон  муайян намуд. Дар ин ҳуҷҷат уҳдадориҳои калонсолон ва ҳуқуқи кӯдакон  сабт гардидаанд.

 

Leave a Reply

Your email address will not be published. Required fields are marked *