Тоҷикистону Узбекистон тавсеаи таъминоти муштараки маҳсулоти саноатии лозимаро баррасӣ намуданд

Дар доираи нахустин Форуми байниминтақавии соҳибкории байни Ҷумҳурии Тоҷикистон ва Ҷумҳурии Ӯзбекистон, ки қабл аз сафари расмии Президенти Ҷумҳурии Узбекистон Шавкат Мирзиёев ба Ҷумҳурии Тоҷикистон баргузор гардид, 9 июни соли 2021 дар шаҳри Бохтар ҷаласаи 4-уми Шӯрои соҳибкорони Тоҷикистону Узбекистон баргузор гардид. Дар ин бора Палатаи савдо ва саноати Ҷумҳурии Тоҷикистон хабар медиҳад.

Зимни ҷаласа масъалаҳои рушди ҳамкориҳои тиҷоративу иқтисодӣ ва сармоягузорӣ байни доираҳои тиҷоратии Ӯзбекистон ва Тоҷикистон, аз ҷумла: ҳамкорӣ дар соҳаи нақлиёт ва коммуникатсия, кишоварзӣ, рушди технологияҳои иттилоотӣ ва тиҷорати электронӣ, масъалаҳое, ки ба рушди ҳамкорӣ байни соҳибкорони ду кишвар монеа мешаванд, матраҳ гардид.

Ҳамзамон дар раванди Форум Шӯрои соҳибкорони Тоҷикистону Ӯзбекистон Протокол ба имзо расониданд, ки дар он тадбирҳо оид ба тақвияти минбаъдаи иштироки соҳибкорони хурду миёна дар чорабиниҳои дар қаламрави тарафҳо дар соли 2022 пешбинӣ шудаанд.

Ҳамчунин, дар заминаи палатаҳои савдо ва саноати ду кишвар, Ёддошти тафоҳум байни Палатаҳои савдо ва саноати Ҷумҳурии Тоҷикистон ва Ҷумҳурии Ӯзбекистон оид ба идоракунии тиҷорати наздимарзии муносибатҳо дар рушди кирмакпарварӣ ва атлас дар доираи лоиҳаи RUTSIS, имзо гардид.

Маврид ба зикр аст, ки Тоҷикистон ва Узбекистон ҷонибдори рушди минбаъдаи робитаҳои тиҷоративу иқтисодӣ, тавсеаи таъминоти муштараки маҳсулоти саноатии лозима, фароҳам овардани шароити мусоид барои ҳавасмандгардонии савдои тарафайн ва инчунин ба рушди куллии ҳамкориҳои сармоягузорӣ  амалигардонии лоиҳаҳо ва барномаҳои мутақобилан судманд дар бахшҳои афзалиятноки иқтисодиёти ду кишвар, мебошанд.

 

Leave a Reply

Your email address will not be published. Required fields are marked *