Ҳамкориҳои сайёҳии Тоҷикистону Покистон густариш меёбанд

Дирӯз Раиси Вилояти Мухтори Куҳистони Бадахшон муҳтарам Ёдгор Файзов коршиносони соҳаи сайёҳии Ҷумҳурии Исломии Покистонро ба ҳузур пазируфт.

Тавре Мақомоти иҷроияи ҳокимияти давлатии вилоят радиои “Овози тоҷик” хабар дод, меҳмонон аз табиати нотакрори Тоҷикистон ҳарф зада қайд намуданд, ки мақсади сафари мо ба вилоят дар ҳамкорӣ бо Кумитаи рушди сайёҳии назди Ҳукумати Ҷумҳурии Тоҷикистон ин омухтани ёдгориҳои таърихӣ ва урфу одати сокиноне, ки дар “Шоҳроҳи абрешим” зиндагӣ доранд мебошад.

Зикр градид, ки дар Ҷумҳурии Исломии Покистон, бахусус дар шимоли ин давлат, солҳои охир ҳазорон ёдгориҳои таърихӣ ва расму русуми қадима, тарзи ҳаёти он мардум омӯхта гардида, чандин қалъаҳо ва ҷойҳои таърихӣ барқарор гардиданд. Дар натиҷа шимоли Покистон ба макони сайёҳии дохилӣ ва хориҷӣ табдил ёфт.

“Вилояти Мухтори Куҳистони Бадахшон низ дорои ҷойҳои таърихӣ ва фарҳангии ғанӣ буда таваҷҷӯҳи ҳазорон олим, тадқиқотчӣ ва сайёҳро ба худ ҷалб кардааст. Танҳо як хонаи помирӣ ҳазор ҷанбаи фалсафӣ ва таърихи қадима дорад. Пайвасти бойгарии ду кишвар ва барқарор намудани ҳамкории халқҳо ва давлатҳои “Шоҳроҳи абрешим” имкон медиҳад, ки ҷаҳон бо тамаддуни ин халқ шиносоӣ пайдо намоянд ва сайёҳӣ ба як соҳаи сердаромади мардум табдил ёбад”,- қайд намуданд меҳмонон.

Гуфта шуд, ки барнома дар якҷоягӣ бо Донишгоҳи Осиёи Марказӣ, Асостсиатсияи сайёҳии экологии фарҳангии “Помир” ва Донишгоҳи Гарварди Британияи Кабир бо маблағгузории давлати Ингилистон амалӣ мегардад.

Бояд қайд кард, ки ҳамкориҳои иқтисодии Тоҷикистону Покистон баъд аз сафари Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии исломии Покистон боз як густариши тозаеро касб кард ва ин барнома яке аз натиҷаҳои сафари Пешвои миллат ба ин давлат мебошад.

Leave a Reply

Your email address will not be published. Required fields are marked *