Дар Маскав чойхонаи миллии тоҷикӣ бо номи «Нур» ифтитоҳ ёфт

Душанбе, 18.01.2021 /Радио «Овози тоҷик»/. Имрӯз дар тамоми шаҳру навоҳии кишвар ҷиҳати созовор таҷлил намудани 30-солагии Истиқлолияти давлатӣ корҳои созандагиву бунёдкорӣ бо маром идома доранд. Сокинон кушиш доранд, ин ҷашнро дар сатҳи зарурӣ пешвоз гиранд. Дар ин замина ҷавонони ватандӯст ва боору номуси миллати тоҷик натанҳо дар дохили кишвар, балки дар хориҷ низ талош меварзанд ҷиҳати 30-солагӣ Истиқлолияти давлатӣ ва муарифии фарҳанг ва урфу одати миллӣ дар шаҳрҳои хориҷ бо таъсиси чойхона, тарабхона ва дигар иншооти маишию фароғатӣ саҳм гузоранд. Аз ҷумла бахшида  ба 30- солагии Истиқлолияти давлатии Ҷумҳурии Тоҷикистон дар шаҳри Маскави Федератсияи Россия ҷавонони тоҷик новобаста ба шароити вазнини пандемияи Ковид-19 чойхонаи миллии тоҷикӣ ба номи «Нур»-ро ифтитоҳ намуданд. Чойхонаи мазкур бо дастгирӣ ва талошҳои  ду ҷавони тоҷик бунёд гардида, муҳайё бо тамоми хизматрасониҳо ва шарту шароити хуб боиси таваҷҷӯҳи мардуми таҳҷоии Маскав ва хориҷиён гардидааст.

Тавре аз суханони яке аз ташкилкунандагони он Фирдавс Саломов дар суҳбат бо рӯзноманигори радиои «Овози тоҷик» Бек Раҳмонӣ бармеояд, кушодашавии ин чойхона на танҳо  барои муарифии хурокҳои миллӣ, балки барои ташвиқи фарҳангу тамаддун ва садои мусиқии тоҷикона барои тамоми тоҷикони бурунмарзӣ, берун аз кишвар мусоидат менамояд. «Тарафи муҳимтарини ин чойхона дар он аст, ки бо кушодшавии он чандин нафар муҳоҷирони меҳнатӣ соҳиби ҷойи кори мусоид мегарданд»,- гуфт ҳамсуҳбати мо дар идома.

Яке аз мизоҷони аввалини ин чойхона бону Юлия мебошад, ки аз бунёди чунин як чойхонаи бароҳату замонавӣ изҳори хурсандӣ намуда, аз хизматрасониҳои чойхонаи «Нур» изҳори қаноатмандӣ менамояд ва онро як макони аҷиб ва истироҳатбоб мешуморад.

«Ин кунҷаки зебо, ки дар як тарафи метрои Динамо ҷойгир аст, хеле ҷойи роҳату барҳаво мебошад. Ин аслан ҳам ҷойи нотакрор аст, зеро бо воридшавӣ ба чойхонаи «Нур» нишонаи офтоб касро истиқбол менамояд ва дар дил гӯё шуъои хуршед бо як гармии Шарқиёна оғӯш мегирад»,- иброз доштанд бону Юлия.

Тавре номбурда дар идома мегӯяд, чойхонаи НУР комилан шарқиёна буда, қариб тамоми таомҳои бомазаи тоҷикона ин ҷо пухта мешаванд. Ман аз он хурсандам, ки ин макони нурафзо ба ҷойи кори ман наздик аст ва вақте ки ман ба толори чойхона ворид мешавам, мардуми ҳар миллат идҳои худро дар ин ҷо ҷашн мегиранд, ки хеле зебо ва диданӣ мебошад.

Ёдовар мешавем, ки чойхонаи «Нур» бо ташаббуси ҷавонони тоҷик дар шаҳри Маскави Федератсияи Россия ифтитоҳ ёфта, барои тарғибу ташвиқи хӯрокхои миллии тоҷик мусоидат менамояд.

                                                                               Бек Рахмонӣ

 

 

Leave a Reply

Your email address will not be published. Required fields are marked *