Вазирони корҳои хориҷии Тоҷикистон ва Қирғизистон вазъи минтақаҳои наздисарҳадиро баррасӣ намуданд

29 апрел бо ташаббуси ҷониби Қирғизистон гуфтугӯи телефонии Вазири корҳои хориҷии Ҷумҳурии Тоҷикистон Сироҷиддин Муҳриддин ва Вазири корҳои хориҷии Ҷумҳурии Қирғизистон Руслан Казакбоев баргузор гардид. Дар ин бора Вазорати корҳои хориҷии Тоҷикистон хабар медиҳад.

Дар доираи вохӯрӣ роҳбарони вазоратҳои корҳои хориҷии ду кишвар вазъи мушкилеро, ки 28-29 апрели соли 2021 дар минтақаҳои наздисарҳадии ду кишвар ба вуҷуд омада буданд, муфассал баррасӣ карданд.

Вазири корҳои хориҷии Тоҷикистон зикр кард, ки рушди муносибатҳо бо ҳамсоягон дар минтақа, ки Тоҷикистонро бо онҳо робитаҳои чандинасраи дӯстӣ ва ҳамсоягии нек пайванд месозад, самти афзалиятноки сиёсати хориҷии кишвар маҳсуб мешавад.

С.Муҳриддин таъкид намуд, ки Тоҷикистон пурра омодаи ҷустуҷӯ ва  дарёфти  роҳҳои ҳалли қобили қабул тавассути музокирот буда, бо назардошти манфиатҳои миллии худ масъалаҳои марбут ба делимитатсия ва демаркатсияи сарҳади давлатӣ бо Қирғизистонро тадриҷан ҳал мекунад. Ҳамзамон ӯ гуфт, Тоҷикистон ҳеҷ гоҳ аз заминҳое, ки аслан ва ба таври қонунӣ ба ӯ тааллуқ доштанд, даст нахоҳад кашид.

Дар ҷараёни суҳбат вазирон аҳамияти ҳалли ҳама масъалаҳои марзи давлатиро танҳо тавассути гуфтушунидҳо зикр карда, роҳ надодан ба кӯшиши иғвоангезонаи тарафҳои алоҳидаи манфиатдорро, ки боиси боз ҳам шиддат ёфтани вазъият мегарданд, таъкид карданд.

Вазирон иброз доштанд, ки набудани эътимод ба минтақаҳои наздимарзӣ метавонад ҳодисаҳои нав ба вуҷуд орад ва оқибатҳои вазнин, аз ҷумла талафоти ғайринизомиёнро дар ду давлати ҳамсоя ба бор орад.

Роҳбарони вазоратҳои хориҷӣ ба мувофиқа расиданд, ки дар ҳалли масъалаҳои мураккаби сарҳади давлатӣ иродаи қавии сиёсӣ зоҳир намудан зарур аст.

Leave a Reply

Your email address will not be published. Required fields are marked *